DEEMSA SHAGGAR Kutaa 1ffaa. Asoosama Gabaabaa

 

                                                                             Kutaa 1ffaa      

                                                                DEEMSA SHAGGAR

Manni keenya  Finfinnee, Magganaanyaatii kaa’anii ituu CMC hin ga’iin naannoo Jack-Kiros’tti argamaa. Naannoon keenya  baayyee calleensa qabaa. Anis kanaaf yeroo hundaa gara galgalaa qaamakoo dhiqadhee, uffatakoo jijjiirradheen qofaakoo irraan gadee Jack-Kiros  gara Garjiitti deemsa (walk) godhaa, baayyees hin deemuu Xiqqooma deemeen muka guddaa an jaalladhu tokkotu daandii cina jiraa. Muka sana jala taa’een  konkolaataa babbareedaa,  Jaalalleewwan nama hin agarre, walii walii isaanii keessati of-argaa deemanfaa ilaaleen  hawwaa. Ayi anaa, ayi qofummaa, Hiyyeessi foolii quufa inni jedhan anaaf jedhamee. Isa isaan
wal dhungutan an taa’ee afaan mimmiiyeeffadhaa, 'earphone'n Sirba jaalalaa dhaggeeffachaa                                                                 shaggariin gaafan adeemuu                                                                                                                           yaa awwaara miillakooti                                                                                                                               shan taate na dura yaatii                                                                                                                                 mammagaallan biyyakootii......... Sagaleen kiilolee sirba Alii kun  jaalallee an tokkoyyuu hin qabne yaadaan shan godhee na dura yaasaa jiraa. . 

Ituun taa’ee jaalalleewwan fuulleekoo taa’anii walqirqidan tokko ilaalee isa isaan achii walqirqidan an asii taa’ee kolfuu, shamarreen waan agarsiisa Faashinii agarsiisuuf deemaa jirtu fakkaattu tokko dhuftee;

 “Obbolee  gara Faawunteenitti   daandiin kun na geessaa?”  harka isheen rifeensa ishee, mataa ishee irraa bakki hankaakee, fuula ishee irra danbali’uuf deemu gara gurra isheetti harkaan deddeebisaa, harka isa tokkoon immoo bilbila ofitti qabaa,  anaanis na millachaa na gaafattee.

 “ Faawunteen…..Faawunteen…Faawunteen…” An ofumaan afaaniin irra deddeebi’ee Faawunteen jedha malee yaadaa fi qalbiinkoo ijakoo waliin bareedina qaama ishee irra asii fi achi fiigaa jiruu. Uffata ishee bifa ammayyaan hodhamee boca qaama ishee waliin sirriitti wal haammatanii jiran sun qalbii na hataniiruu, Haammadhu haammadhu nama godhaa.

“Hin fagaataa laata as irraa, Taaksiin deemuu?” gaafa isheen irra deebitee jettu xiqqoo ofitti deebi’een

“Hin fagaatu anuu sin geessa   asumaa ”  

“Asumamoo?” 

“Eessa jette ammatii?”  Gaaffii isheen na gaafatte na harkaa bade, anaan gaaffii bareedduun kun harra eessaa baate, isayyuu lafa deemaa dhufte, gaaffii jedhu keessa galeeraa.

“hhh bakka hin beekne dhiyoodha jettamoo? Faawunteenin jedheem”

“ Beekam sobeeti malee,   asuma dhiyoodha irraan gadee kana buutee” jedhee gara mirgaatti gortee akka isheen Faawunteenitti baatu dubbachuuf jedheen, yoon hunda isaa itti hime gargaarsakoo hin barbaaddu kun jedhee yaadeen.

“Daandii isa jalqaba gara bitaatti goru bira dabartee, ammas isa lammaffaa gara mirgaatti goru bira dabartee……. Uyii kun si rakkisuu danda’a sin geessa malee”

“Natti himi na hin rakkisuu”   bilbilli ishee bilbilamnaan kaastee

“Eyyee naannoma sanan jira, qax jedheeman gadi dhufaa?, eyyee nama gaafadhee dhufaan jiraa” bilbilaan haasoftii

 Isa bilbileefii qax jedhii gadi kottu jedhuun,  keessakootti qaxii si’aa kotu jechaa.

“kottu daandichi namaaf hin galuu, anaanuu guyyaa tokko Boontuun, ihii Boontuun obboleettiikootii, achitti waamee jennaan daandii wallaaltee hammam rakkattee namni fidee” Boontuu mucaa jedhamtu guyyaa tokko Hoteela Faawunteenitti beellameen turee.

 

 

Ishee waliin isan deemaa jiru keessakootti of-jajaan jiraa. Ituu hiriyyoonnikoo waliin na arganii hedduun gammadaa keessumaa mucaan safara keenyaa Kuulleen ituu na agartee keessasheetti ibiddi qabatee natti tolaa. Maal ta’a waaqayyo ituu Kuullee natti  fidee jechaan deemaa.

“anis eko guyyaa tokko dhufeen turee, garuu konkolaataan waan ta’eef bakka isaa hin qabannee”  jettee

 “Konkolaataan gaafa deeman daandiin namaaf hin qabamuu,   as irra gadi gorraa” karichuma sobee walxaxaa gochuuf jedheen gadi gorra jedhe malee karaama sirrii irra  deema jirraa.

Mucaan hiriyyaakoo Firaa’ol  daandiima irra deemaa jirru sana cinaan kutaa tokko kireeffatee galaa. Gidduu   waan galeef furtuun isaa na harka jiraa. Kanaaf  sammuunkoo bakka lamatti wal hiree mormii jalqabeeraa.

Bilbilli ishee bilbilamee

Bilbila Kaastee “geenyeerra, mucaa na fidaa jirutu jiraa, isayoo hin beekuu” …………..

Itti Fufaa…………………….Guyyaa borii nu eegaa.

Barreessaan  Daanlolaa  Waarii

Finfinnee 1/26/2022

#AsoosamaAfaanOromoo

#Mammaaksa

#Hibboo

#OduuDurii