MIRRIYSAA/ MIRRIGA AADAA OROMOO FUGUG /HARARGEE

 MIRRIYSAA/ MIRRIGA AADAA OROMOO FUGUG /HARARGEE

<><><><><><><><><><>

Oromoon Gadaa qaba ,Afaan qaba, Aadaa qaba ,Seenaa qaba,Heera qaba, seera qaba , duudhaa qaba ,Safuu qaba.

Gosti Oromoo Fuuguug \Harargees Sirna Gadaa Odaa Bultumiin heera tumatee ,seera muratee ,Gumii Raabaa Dooriitin Hayyoota Gadaatiin wal taligaa ture.Gaaddisa kana jalatti Gootummaan lolanii lolchiisuun ,cinatti bifa afoolaatiin cunqursaa fi roorroo, Gaddaafi Gammachuus ta'ee Abdii horannaa karaa Geerarsaafi Mirriysaan ,Shoobdoofi Dhiichisaan ,Walaloofi Walleen, Shaggooyyeefi Heelleedhaan ergaa dhuka qabduun dabaalee iyyee iyya dabarsuun wal dadameeysaa dhalootaa dhalootatti dabarsa .Mirriysaaniis gosoota afoolaa keeysaa tokkoo san keeysaa muraasni kunooti.

☆☆☆☆☆☆☆☆☆☆☆☆

" Kadhataan saree jibbaa

Gowwaan keessummaa jibbaa

Nama niitii wayyaatu

ollaa dardaraa jibbaa

namni waan fedhu dhabe

mataa ofiituu ni jibbaa

aadaa isaa beekuu dhiisii

maqaan isaatuu ni dhibaa

kan aadaa isaa tuffatu

kan seenaa isaa tuffatu

qiciiccaa lammii tiyyaa

anas garaan na jibbaa "

~~~~~~~\\~~~~~~~

" Leenca gamma hin qabanii

Nama nyaataaf dhabanii

Arba oloo dheeysanii

Nama reebaaf dhabanii

Gaangee cancalli citee

Tan fuuloon ciccitee

Mogolee maa sakaalanii

Loon abbaan tiksu hateef

Gosa maaliif yaamanii

Jiraa maa si saqanii

Eegee gaalaa coqqollee

Abbaan of dhaaduu tollee. "

◇◇◇◇◇◇◇◇◇◇

" Muka mukaa guddaa

Hadaammin baala qabduu

Hiddiin hidda qabduu

Diddiimtuun akka qabduu

Yaaboo haati kabajaa qabduu

Mee keessa ilaalaa

Teenya Shanyii kabajaa qabduu.

•••••••••••••••••••••••••••••••••••••

" Harree duugdi moluudhaa

Dalluu baaftii hin eeganii

Gaala mataan moluudhaa

Gaafa baaftii hin eegani

Gowwaan hededa jigee

Baasaa tolaa hin eeganii.

▪︎▪︎▪︎▪︎▪︎▪︎▪︎▪︎▪︎▪︎▪︎▪︎▪︎

" Bobbaan Jaldoo waldhabee

Booyraa garaan gunuunaa

Bobbaan gaalaa walbaddee

Qoqaa garaan gunuunaa

Bobbaan lammii wal bade

Jiraa garaan gunuunaa

Bobbaasee walii galchee

Tiksee waliin barbaadee

Guyyan heeraa kunoo

Gunuunummaan raawwatee "

*****************************

"Umar kuulleen Fadisii

Abdulleen Hammarreessaa

Quufaanii kafranaanii

Rabbiin namaan balleeysaa

Qamadiin boollaa taanee

Garbuun beegala taane

Waanumaan boolla taanee

Guddisa ilmaa taanee

Maaluumaaf lafa haanee "

☆☆☆☆☆☆☆☆☆☆☆☆

Tofik Yousuf iin( Jiraa Sabaa )

Dec 18/12/2021

Finfinnee ,Oromiyaa .